მაკა ბოჭორიშვილი საქართველოში მალაიზიის ახლადდანიშნულ ელჩს შეხვდა
საქართველოს საგარეო საქმეთა მინისტრი, მაკა ბოჭორიშვილი საქართველოში მალაიზიის ახლადდანიშნულ ელჩს, აჰმად კამრიზამილ მოჰდ რიზას შეხვდა. მინისტრმა მალაიზიელ დიპლომატს თანამდებობაზე დანიშვნა მიულოცა და მომავალ საქმიანობაში წარმატებები უსურვა.
შეხვედრაზე მხარეებმა მიმოიხილეს ორმხრივი ურთიერთობების დღის წესრიგი და იმედი გამოთქვეს, რომ არსებული პოზიტიური დინამიკა შენარჩუნდება და გაღრმავდება ურთიერთობები ვაჭრობისა და ეკონომიკის, ასევე განათლების, კულტურის და ციფრული სერვისების სფეროში.
ხაზი გაესვა ორმხრივი მაღალი დონის ვიზიტების გაცვლის მნიშვნელობას და ამ მიმართულებით ინტენსიური მუშაობის გაგრძელების აუცილებლობას.
საუბარი შეეხო საქართველოში არსებულ ხელსაყრელ საინვესტიციო გარემოს, ორი ქვეყნის ბიზნეს წრეების დაახლოების შესაძლებლობებს, ასევე, საჯარო სერვისების სფეროში საქართველოს წარმატებული გამოცდილების გაზიარების საკითხს.
ტურიზმის და ხალხთაშორისი კონტაქტების გააქტიურების კუთხით, მხარეებმა კმაყოფილება გამოთქვეს საქართველოს და მალაიზიას შორის უვიზო რეჟიმის არსებობის გამო.
საუბარი შეეხო ოკუპირებულ ტერიტორიებზე შექმნილ მდგომარეობას და საქართველოს მთავრობის სამშვიდობო პოლიტიკას.
მაკა ბოჭორიშვილმა მადლობა გადაუხადა მალაიზიურ მხარეს საქართველოს სუვერენიტეტისა და ტერიტორიული მთლიანობის მხარდაჭერისთვის.
შეხვედრის დასასრულს მხარეებმა დაადასტურეს მჭიდრო თანამშრომლობის სურვილი.
